S.C.D. BUÑO 0 - C.D. BAIO 2
Vitoria
700 na historia do CD Baio a colleitada na tarde do domingo en Buño,
con resaca aínda da Micaela do día anterior, pero que levou ao
campo de Xaviña uns 200 afeccionados nunha tarde ameazadora de
chuvia. Non tivo moitos atrancos o equipo baiés para sumar un novo
triunfo ante un Buño que non puxo en apertos en ningún momento a
meta baiesa.
Cun
Buño pechado atrás e un Baio tratando de mover o balón buscando os
ocos na súa defensa principiou o partido, que tivo a súa primeira
oportunidade nun saque de córner que rematou Isaac e o balón foise
rozando o pau (min.9). O Baio topouse co traveseiro ata en catro
ocasións durante o partido, a primeira delas foi no min.16, cun
zurdazo desde a frontal de Moreno, que entre Gesto e o pau impiden
que o balón entre na portería, e a segunda só catro minutos
despois, cando Bieito aproveita un rexeite que lle cae na frontal e a
súa volea peta no pau. No min.24 chega o primeiro gol, nun balón
que recibe Martín MC que sen pensalo dispara á porta desde
40 metros e o balón cóase pola escuadra buñesa. Nunha contra
baiesa Martín MC intérnase na área e tras desfacerse do defensa
dispara con violencia e o balón volve petar no pau traveseiro
(min.32).
A
segunda parte seguiu polo mesmo camiño cun Baio tendo o dominio do
balón e do xogo, e xa no primeiro minuto Javi Suárez tivo unha boa
oportunidade pero o seu lanzamente sacouno Gesto a córner. A única
ocasión do Buño veu dun lanzamento de falta, que Alexander tirou a
colocar pero Diego moi atento conseguiu desviar (min.58). Unha
combinación de Martín con Martín MC serviu para que este
marcase o segundo gol no min.63. Tres minutos despois chegou o cuarto
tiro ao pau do Baio, nesta ocasión cun forte lanzamento de Javi
Suárez. Cos cambios arrefriou o partido e os xogadores foron
deixando pasar os minutos. Puido marcar Bieito nun man a man o
terceiro, pero o porteiro local conseguiu sacar a córner e chegouse
ao final co 0-2 no marcador.
Con
esta vitoria segue o Baio sumando para continuar na loita, unha loita
na que ninguén dá o seu brazo a torcer e unha semana máis gañaron
os cinco primeiros. A vindeira semana visita o Platas Reinoso o
Castriz do ex-xogador e ex-adestrador baiés Mata.
XUVENIL:
C.D. BAIO 5 – CAMARIÑAS F.C. 1
Cuarta
xornada e cuarta vitoria nesta liguiña previa da Copa da Costa
Xuvenil, na que o Baio foi moi superior ao Camariñas no mediodía do
sábado e perdoou numerosas ocasións. O primeiro gol chegou por
parte de Regueira, nun lanzamento de córner directo. Queiro
poñería o 2-0 co que se chegou ao descanso. Na segunda parte, máis
do mesmo, con moitas ocasións erradas polos locais, pero aínda así
chegaron os goles de Estefan e
Damián. Coa relaxación habitual chegou o erro que permitiu que
Brais marcase o gol dos camariñáns no seu único tiro a portería.
Luis, que careceu de fortuna cara ao gol, puido por fin marcar
o seu a pouco para o remate do encontro e poñer o definitivo 5-1.
Con
esta vitoria seguen no alto da clasificación os baieses, que a
vindeira semana viaxan ata Sofán, para enfrontarse ao segundo
clasificado, que só perdeu no Platas Reinoso.
No hay comentarios:
Publicar un comentario